奧運完了

終於都等到呢一日

正如基恩所講
開始時睇落
好似有排都未到
去到呢日睇返
又好似眨下眼就無左

最後一日
聽到一句「甘句」
叫做「體諒下北京同事」
原本最後一日都係因為收故仔而「慶慶地」咁過
不過諗諗，呢日係「腦細」生日
聽到佢打落黎笑笑口問我地點
都有種「唉‧算啦」既感覺

出到旺角
去打冷
先見到「周潤發」同「狄龍」
即係型到爆既朱楓同大頭
佢地仲要捱多個禮拜

兩男一女去打冷
可能太餓鬼
夾埋叫左五個菜一窩粥
不過焦點仍然在於「喊」
亦都證明我之前諗既
大致上都正確
智力加左十

雖然過左奧運
仲有個美網同殘奧
但已經唔需要狂踩
可以恢復輪放
開始覺得係放假中
開始想去下旅行

奧運接近尾聲

已經無能力再逐日、「逐幾日」
去update呢個日記

我諗呢次奧運
真係算係職業生涯其中一個經典
我自問都算係捱得
至少擔得抬得
怎住大半個月返工唔放假
都唔係未試過

但係呢個月
怎住日日都要踩十四五個鐘
最少都要踩十二
我發覺個人除左無精神唔夠訓之外
做野、諗野都好似慢左
本身隻耳已經有些少問題
而家更加經常性出現「hang機」情況

捱到呢一日
開始無左岩岩開始時果種「慶」既感覺
開始明白就算點樣「慶」
都解決唔到問題
改變唔到乜野事實
「慶」只會令自己更加辛苦
所以
與其「係撚」咁「慶」
不如「係撚」咁說服自己專心工作

可能我成日都笑笑口搞爛gag
無人會覺得我真係會「慶」
就好似今日咁
有隻故仔
1200完左
我1230已經pack左
隻故仔去到下晝
有同事話要update加埋bite扒

計計埋埋
果位同事應該好多時間做
而佢都應該明白佢隻新故仔要趕1800
兼且要45秒內包晒所有bite扒vo

結果
我五點四打去問一問
原來條稿剛剛先比老細濕完
當時已經呆左
即刻同晶晶講
都已經知大鑊
跟住即刻睇段稿

唔睇猶自可
一睇真係把撚火
成篇稿都係用返我果d shot
只不過係將我d vo執過少少字眼
再斬短少少

既然係咁
由完場之後咁多個鐘
點解唔一早搞掂落黎比我地跟？
如果自己有野跟
點解唔叫其他同事寫/V？
等到1800開始前半個鐘先掉落黎
仲要條vo最後1750先到
最後結果就係成四個人一齊執手尾

最令人想死既係
明明講好左45秒全包
落到黎段vo已經44秒
兩個bite夾埋十幾秒
咁點？
又要時間cut vo cut bite

之後老細打黎問點解cut左個bite
又話佢地果邊計晒時間全包45秒
我當時真係火到想同佢講
不如你自己開部機黎睇下個bite加vo有幾多秒再同我講
奧運出片有時間限制
我地個個都盡量急口令咁去
個個d稿都質到滿一滿
明明預好晒時間
結果又要趕頭趕命cut vo去就
我諗唔係真真正正做過限制片
一定唔會明白cut vo並無平時咁容易

feed片落黎成日無set返個名
係咪prefer我地好有時間去慢慢抄條片出黎？
係咪prefer成個新聞台server得你地feed野返黎？
同feed片果位工程同事講個名有幾難？

想講既實在太多
但一諗起我而家得返三個鐘頭訓
我唔停都唔得

奧運唔知幾多日

繼續做菲比斯專員
終於做到佢拎夠八面金牌
做埋隻profile
以為「大任」已過

今日
劉翔初賽
賽前令我煩惱既
係點樣計分半鐘package
包四場田徑再加一場三鐵墊底
仲要諗點樣好好運用每場田徑四秒片
諗完又再要諗四秒要加賽前幾多秒定賽後幾多秒
已經夠煩

好
開埋個早會
出去喪諗
終於有個大綱

劉翔十一點十開跑
開跑前段稿都差唔多埋尾
只係等佢跑完就去做隻故仔比1300

隨住三聲好響既「澎澎澎」之後
緊接落黎就係一個令人呆晒既消息
再接住落黎
就係有人行過黎叫我做隻故仔比1230

當時
已經係1200
要做隻聲比1230
仲要頭條
仲要段稿要從頭寫過乜七都要改
我真係呆晒

半個鐘頭...唔係
應該係25分鐘
寫、抽shot、剪
我終於明白
點解有人話
當一個人感受到有危險威脅既時候
人既能力係能夠突然提高兩倍

結果順利出街
然後成日就係咁update
up到1900之後
我已經覺得自己變成人乾
個口好似梗左
對側邊d野都無乜反應

所以
當基恩叫我早d走既時候
我都只係「還價」話食埋飯先走



呢日寫故仔
下晝曾經花左好多腦汁
去寫一隻自己覺得好touch既故仔
結果
比老細一改
又消失左

好戲在後頭
馮經理睇完段稿
叫我埋佢位
同我「硬上」左一堂

其實
咁樣「上堂」
都幾「樣衰」
而且
佢同我講既野
基本上我都唔係100%明

直到
照住佢要求
V好剪好key好
再睇個成品
先至明

坦白講
就咁睇段稿
睇唔出有乜特別

但咁既稿
配咁既片
出黎既效果
真係好好
至少學到野

不過
我始終都覺得
我寫果條稿...係好好...

八月十二至十四日

奧運月第九日
開始做菲比斯專員
返到去最大任務就係做菲比斯

呢個月個人完全封閉無運動
為左唔想肌肉退化
每日都特登早少少落車行一段路
不過
放工時間
係下畫時份
個太陽對我好好
曬到我一棟都無





奧運月第十日
今日菲比斯做左大紅人
諗住寫隻pkg好睇少少
諗好晒點鋪排

段稿比老細完之後
沒有懸念
繼續做機械化快譯通電腦辭典發音式評術員

有時真係唔明
點解唔可以加些少背景資料
根本一條咁好既新聞
就唔應該用一個咁平板既方法去讀
根本就係浪費一單新聞

淨係形容場賽事
「第一次掂池...中段發力...帶出幾個身位」
平時無睇開游水既觀眾睇完
都唔會知呢場賽事除左菲比斯之外
仲有乜野其他資料

可能我太多餘
太加鹽加醋

返到去
收到電話
返第二朝七點
於是
訓左呢個月以黎最lum既一場「覺」



奧運月第十一日
呢日
又有一條勁爆既新聞
好了
我學精了
我真係搞盡腦汁
著墨去寫呢隻古仔

「第一次參加奧運既....就表現出驚人水準
或者世界紀錄保持者？？？，賽前都無諗過
呢兩位小將，會帶黎咁大既衝擊...

？？？保唔住呢面金牌，仲要睇住呢兩位小
將，打破自己保持既世界紀錄...」

本來
仲想再寫好d
但係突然提早一個鐘出
乜都要快字行先

最終
都係同以前一樣
變返一隻平板既故仔

由呢日開始
改返朝早六點
做游泳專員
但工作時數
仍然免不了十四個鐘...

八月七至十一日

奧運月第四、五日

經典
夜晚返工
都預左第二日無得走
但係點都估唔到
破晒紀錄

由於太耐無寫日記
我都唔記得做過d乜野
總之我記得
做到八月八日下晝收工
並無返屋企
去食左個飯
就去我阿姨公司度訓左一個鐘
之後
再返工

好
趕1900卡士
上面fit唔到野落黎
甩左

好野
我終於見識到《英雄》裡面最經典一幕
一萬支箭一齊飛埋黎

「溝通唔好？炒個囉喎！」
「你地呢組可唔可以做好d溝通啊！」
「明明聽住你地話有，話落緊黎，而家呢？」

我諗
假如當時
真係我地做錯
我地應該會覺得內疚

內容唔想講
只係我覺得睇住基恩比人鬧
真係千言萬語在心中

又經過一個型到爆既開幕禮
再踩多晚通宵
最終成三十五、六個鐘之後先返屋企
訓左四五個鐘又要起身
成身d肌肉好似想搞政變咁...






奧運月第六日
第一日賽事開鑼
估唔到preview會係我地寫
實在太好
好到形容唔到

我都唔記得果日發生過乜事
只係由呢日開始
開始覺得
人真係有分上中下等
覺得自己只係一件斯文既「咕喱」
慶幸自己未算一個斯文既敗類





奧運月第七日
開始入正軌
開始無咁喪
但一日最少仍然要踩十四個鐘

踩都唔係問題
最弊係踩緊既時候
有人會覺得「你地咁樣踩唔係做野個喎」
根本無planning







奧運月第八日
開始麻木
開始工廠化
開始在奔波的工作中程式化
開始在無窮無盡的勞動中慢慢腐化

八月六日

奧運月第三日
返夜晚十二點
返下書點幾兩點
開始覺得自己係度燃燒生命

全日最精彩
就係搞1100個PC
當大家以為好努力搞掂隻故仔
到頭來原來係大家搞死左自己

今日望聽日
聽日應該屋企都無得返
一野踩盡油既報酬
就係捱多十幾廿日

八月五日

奧運月第二日
輪到我受死

前一晚
返八點
一直返到第二朝
由於打八號風球
大win基恩返唔切黎
被迫硬著頭皮代表體育組開大會

入到去
等左一陣就齊人
由於無端端埋左一埋野埋黎
我一入房就好似咪notes咁咪d資料
搞到馮經理問：「體育組呢」我都聽唔到
搞到佢要出去搵我
當佢返黎既時候就話
「哦，原來你代表體育組開會，你介紹下自己先啦」

當時既感覺
就好似group interview咁
我緩緩起身答
「我係體育組既郭灝然，我係代表紀恩黎開會既」
有人見我坐得好邊，於是就話：
「黎啦，你坐埋黎啦，你係主角黎架」

唔該晒
我硬著頭皮坐埋去
我一坐
就見到紀恩趕到入黎
都好
安信兄弟歸位都無咁驚

講講講
講晒其他組有乜故仔
到我
我就扮到非常淡定
用把感冒未好返既超重低音講
「今日十一點，阿威會有隻....」

講完之後
由於用片時間有限制
我多口講左句
「會睇睇個記者會有無特別野
如果無特別野可能唔要
因為有限制」

點知
馮經理話
「就算單野無料
都要通知返我地
我地都要有個知字」
唔...

跟住
講到maggie做live
講到book衛星時間
就企左係度
一則我地無同中國組溝通過
以為佢地有晒安排
搞到中國組同我地都啞晒
二則唔知老細book左衛星無通知上面
比馮經理話我地做野無同上面講
搞到比人入

我同紀恩啞左咁比人話
難怪佢開完會之後都同我講
「馬田，你明白我既苦況未？」
完全明白，完全明白

不過
衰左
最緊要硬著頭皮補鑊
我同紀恩就硬著頭皮過去中國組
同人夾料、講埋之後既安排
好在中國組個同事都ok nice
總算無驚無險

雖然我唔知馮經理係咪「明白」體育組咩情況
但係佢搭住我同紀恩講左句「佢地都辛苦架喇」
果下真係ok

等埋個live出街
12點半倒先走
出到去
call的士無車
ok

出街橫風橫雨截的
架架一停車就走唔載客
又ok

我一路行出荃灣一路截
已經唔記得行左幾耐
把遮都吹到拗晒骨
卒之比我截到架
返到去
已經係兩點

我真係好想平平地搵個荃灣房仔短租一個月
可惜搵唔到

唉

八月四日

今日
係奧運月第一日
公司大致平靜

之前一日
同基恩出席呢個月最後一次足球活動
原本星期六晚已經走左去街場跟隊踢餐飽
但係基恩叫到
自然兩脅插刀
不過好可惜
由於我病左成個幾禮拜
都仲未好番
加上基恩都病埋
兩個落到場好似一對病拐
結果輸得好甘
之前連續個個禮拜日贏波笑住走既情況
已經成為回憶

基恩呢日已經開始受耙
返朝九放晚十二
我hea埋呢日
八月五都要返晚八

今年八月實在開心到震

---------------------------------------

呢幾日返工
開始講到野
不過做VO把聲
仍然係超重低音
呢日讀雲尼斯達萊退役隻故仔
突然覺得自己好有潛質做濕檯（我指把聲...）

前幾日d新聞多到十蚊三件任揀
呢日d新聞就少到得返d爛橙
好在臨天光前雲佬宣布掛靴
雖然我唔係佢球迷
但都要衷心講聲「唔該晒」

---------------------------------------

呢幾日
每日都見到一隻身長兩厘米既蚊飛過
無錯，的而且確係一隻蚊
至於點解佢會咁大隻
我真係唔知
但我就有種好想拍暈佢
然後再搵天拿水（用黎溝塗改液果d）
一滴一滴滴死佢既衝動