信念

話說十年前
當年我初入行做雜誌
一個星期要嘔十四五版
試過有一次
足足30幾個鐘無返屋企
不斷重覆出去採訪同返公司寫稿呢個過程

又
大約七至八年前
試過有一次
朝早放工之後
飲個茶直踩下晝踢個球迷盃
然後再晚飯然後又返工到第二朝

我個人就係咁
覺得有意義、好玩、想做既野
係可以無限體力

對上一兩年
明顯覺得自己頹了
開始有把聲叫自己收皮了

「抖下啦」

每次都係要經過一輪交戰先有答案
可惜每次即使個人出左去
即使知道自己有貨既
都好快會覺得攰、想走、甚至眼訓
有時甚至純粹係放工去玩去踢波
一到夜晚就開始發呆無貨賣
我以為我老了
以前放工去玩玩完返工既日子過去了

原來唔係

自從前個星期開始keep住日日操下
放假又去爬下石
我又再可以過返d玩完返工直落既日子

剛剛星期日
下晝踢波、去生日會、happy hour再晚飯
然後返工仲可以寫兩隻SOT同六隻LVO
寫到第二朝都覺得仲有貨賣
我就知我開始返番黎了

當然
之後果日訓足全日訓到2046

做人真係不能放棄自己

軟飯

上個星期既課題係操fit自己博食軟飯
堅係日日游水做fitness
見到開始有少少線條就感覺蘇豪
不過我份人有個優點就係為食
做完運動果種飢餓係會令我個大腦發出訊息
控制我對腳飛奔去搵野食
結果就係呢邊減完果邊又加番
我相信呢個係一個永續而無止境既project
分分鐘可以延續到2046都見唔到馬甲線

乜食軟飯好失禮好無鬥志咩？
我覺得一d都唔係
就好似出黎社會做野咁
你打唔到一份dream work
咪搵份養到你既工黎做
搵唔到理想咪追尋下現實
有乜問題

當然我都係鳩up下

但我唔排除會認真考慮
咁囉

呢個世界
一唔夠人講就話自己純粹鳩up再屌番人做乜咁認真既
大L把

分屍

阿Ron苦口婆心勸過我
快d拍拖然後結婚
阿菲問我點解唔正正經經搵個女朋友

堅Sir話齋
唔容易架

好好笑
當我真係ok認真咁去嘗試追女仔
去到某個位
就會聽到d「啊，其實你無乜理由無女朋友呀」
「其實你係咪玩架？」
「我都係唔係好信喎」

初初
都真係會認真解釋下
但後果都只會係將個問題推落下一層
「如果係，你唔洗咁cher啊」
「點解你咁緊張呢？男人到左三十幾其實仲好有market喎」
「我唔信...（下刪一萬字）」

我成日都話
人係好怕寂寞既動物
我份人雖然唔多出聲
但我都係一個好正常既人黎

悶起上黎
叫埋紀恩冒住俾人話hehe既風險飲兩杯，昅下女

結果就係
「你條仆街成日落bar溝女」
「拍乜L野拖呀你算罷啦」
「大L把貨架」

我知道
如果我因為咁而又去改變自己
街唔去酒唔飲放假匿係屋企
後果將會係
「屌你成個毒L咁款邊有女埋黎？」
「下？你放假會留屋企咁乖？唔好成日吹水啦」
「廢青成身負能量真係搵鬼要」

所以
當前排股市大跌
當個人無左一舊錢綁住之後
個人突然又豁然開朗了

根本從一開始
就應該活在當下
太顧慮人家眼光
只會令自己變到不倫不類
同一番說話
我經常同人地講
經常游說人地做番自己
但偏偏我自己就一直都識講唔識做
我覺得呢個世界最辛苦
唔係聽人點樣串柒你話9你
而係你有一班人真真正正咁關心
但句句都叫你向唔同方向執下自己
人人都真心對你好
但後果就係將你既個人價值
五馬分屍咁撕開得零零碎碎

與其經營一段關係
不如經營一下自己

要食軟飯
都要有d料先食得起吧（笑）

砒霜

甲之蜜糖
乙之砒霜

從不以砒霜為恥
總會有些時候
砒霜會變成蜜糖

時間像行雲流水
不斷帶著砒霜和蜜糖循環流去