怪醫

怪人睇怪醫

前一日因為瞓覺呼吸困難睇醫生，醫生照一照見到喉嚨好似發炎，開咗消炎藥止痛藥化痰藥，一日過後冇好轉仲好似嚴重咗，反正睇醫生係放題，揀咗個唔係集團式，又喺屋企附近嘅醫生睇

上到去間診所，好似去咗80年代港產片嘅片場，裝潢格局新舊程度都好80年代，就連病人登記都係要寫紙，心諗好呀，老醫生應該有經驗，但登記完之後再諗，覺得有啲怪，做咗咁多年醫生應該有熟客，但係星期六呢啲比較難睇醫生嘅時間，成間診所居然一個人都冇，開始覺得有啲資訊唔對稱

入到去循例問咗發生咩事，醫生就開始同我介紹佢嘅正向醫學理念，俾咗三十幾張PowerPoint我睇，話我今次喉嚨發炎，但冇乜其他傷風感冒病徵，係因為我個人長期處於壓力，壓力令到身體出現炎症

Wow，我仲以為係紀恩傳染俾我

啲PowerPoint我冇仔細去睇，因為講嚟講去佢就係要我接受套理論，調整好自己嘅呼吸（慢呼吸)，之類之類，仲話俾我嘅藥丸個藥丸袋上面，有個QR code，得閒可以click入去佢嘅YouTube度睇吓，我承認我好仆街咁諗過佢係咪會Sell啲乜嘢班，但最後冇，佢話循例做樣交功課都會開啲藥俾我，但最重要係我調整好自己嘅壓力同埋情緒

應該話係個天整定，定係我人生中嘅一次偶然？

如果係偶然，咁都幾中