鬼屋

夢見以前老母開舖嘅商場，入邊所有舖頭都變晒鬼屋（玩嗰啲），每一間都好似青樓妓院咁，叫我埋去幫襯，我行到入邊其中間坐低咗，無端端有隻狗出嚟陪我，好乖好靜咁坐喺我隔籬望住我

店主出嚟問我係咪想玩鬼屋：

「係咪玩鬼屋？」

「唔係呀，純粹睇吓」

「點解想睇？」

「緬懷吓以前同條女玩鬼屋」

「唔入嚟玩又點樣緬懷呢？」

「得我一個玩，我可能會驚，而且我都冇乜玩鬼屋嘅癮」

「同條女玩又會唔驚喎」

「傍住佢乜都唔驚，你諗到要保護自己愛嘅人，自然啲勇氣、腎上腺素就唔知點嚟」

「唔…如果你想放低佢，就入嚟玩啦」

「點解？」

「唔面對你又點放低？」

然後佢開門俾我，我身邊隻狗無端端起咗身，望住我喺度喊，我有啲唔明，但都摸吓佢個頭轉身入去，入面原來只係一間雜物房，有個尿兜同一個木偶，我完全唔知做乜，不過來都來了，就屙咗篤尿

然後就急尿起身了