九月十月

終於都完左奧運
但又適應唔到時差

終於都有得清假
但又撞正旅遊旺季

想去尼泊爾
無機位
算

想去土耳其
齋機票承惠八千幾
都算

想去柬埔寨
撞正無團、無機位
要月尾先有
可以點？

最終
又係臨急抱佛腳地去台灣
如果今次去到撞正打風
我發誓我會上黎呢度打粗口



今日個人比較燥
原因係比個師奶撻著左
事緣今日大雨、勁大雨
街上d遮隊黎隊去
都預左

而我
可能體積相對地大
亦有可能因為樣衰
多次比d小朋友同師奶
用把遮幫我洗面同抹身

算啦

正當我抱住「算啦算啦」既心態
返到屋企樓下條斜路
以為終於可以嘆一口氣
點知有個師奶
開行把遮霸晒條路咁滯
要注意條斜路係有瓦遮頭既
我已經收左把遮
亦都因為咁樣
佢把d尖位就界落我塊面度
我真係忍無可忍同佢講左句「喂睇住啦」

佢答左一個好有哲學味道既答案：
「把遮無眼架嘛，點睇啊？」

當時我第一個反應
係「啤」左一聲
我係度諗
把遮無眼
個人應該有眼掛？
唔通你靠把遮黎睇野？
定還是把遮唔受你控制啊？

越諗越唔掂