報夢

尋「晚」發夢，係咁打日記無停過，一路打一路笑，我相信係呢個日記既冤魂報夢比我，要提醒我打日記...

日記小姐...我會寵幸你多d架喇，原諒我...


前一排睇介紹，知道元朗楊氏烏頭，大圍都有得賣，於是，趁放假，on99地去傻一次

原先以為應該唔平，但原來只賣25蚊條，而且條條新鮮（鱗無啞色，成條彎左僵硬晒就係新鮮），不過呢個價，已經係大陸烏頭既一倍...

返到去，急不及待整黎食


一刀劈開兩截，一個人食無理由用大碟


切蒜頭係一個好煩既程序


但隻手就無得救，陣味到第二日仲聞到


好不容易先同條魚上好妝


又好不容易先至蒸熟


值得開心既
係條魚真係無泥味
好耐都無食過咁鮮既烏頭

不過
食完呢條魚之後
當晚同阿mark去食清真牛肉餅
就無乜胃口了...

=================================

舊年奧運之後，係花墟撞返以前街場踢波識既一個「o靚仔」阿俊，之後約佢隊波踢幾次友賽，開始有聯絡

到前一排，佢忽然問我有無興趣同佢地踢，以我呢隻波牛，又點會say no呢？

第一次同佢地踢波，都有些少緊張，緊張唔係因為怕「生譜」，而係開始驚，會唔會因為「走得慢、無速度、唔夠快」，而搞到出醜

畢竟我份人都「要d面」，如果同班初初識既一齊踢，就算踢到幾唔掂，我都可以厚顏地「呵呵呵」，但對住佢地就唔同，話晒以前街場我班fd「惡晒」，而家係佢地面前大出洋相，就未免有點...

一開波，佢地就叫我踢正選，仲要踢返好耐無踢既中堅，無計，唯有硬著頭皮豁出去

一開始真係有少少適應唔到，但係踢落又ok，開始摸索番個位置，開始「指指點點」，開始識得叫兩邊位「做d自己未必做到既野」，開始識得揀d應該表演既位，例如人地質斜直線，就訓身剷走個波，一來係咁狂屈「印象分」，二來話比對面班友聽，個中堅唔係「企」既

結果呢場波，贏對面班好氣好力既後生仔五、六球，當然，我都要多謝我呢班同樣好氣好力既隊友

不過，呢場波之後，我就覺得自己好有「老將feel」了，真係唔想體能老化得咁快，一定要努力keep落去...