感覺

很久沒嘗過這種感覺。

很久，即是多久？答案就同「feel」一樣，不能實答，只能抽象聯想。

很搞笑的，兩個未曾見過面，但又不能說完全陌生的「陌生人」，相約
飯局，說穿了，就是ICQ時代的網聚行為，好在見面地點由「旺地恆」
升級至時代廣場UA，更好在見面目的未有進化至潮爆的「援助交際」。

「哈哈」這個「笑聲詞」很好用，雖然用得很爛，卻足夠形容這兩個人
見面時那種無聲尷尬靦?與拘謹，我很慶幸香港有種叫「爛GAG」的土
產文化，發明的人是天才，應有的隔閡破了不少，即使Dead Air仍偶有
出現。

吃飯了。

吃甚麼，永遠是令人煩惱的課題，嗜辣的，濃味的，清淡的，單是味道
上的喜好，一百人分分鐘有九十九個不同答案，還未談菜式選擇，中菜
西餐壽司韓燒還是印度咖喱，拍拖還好，至少你知道對方/對手一個大
概，但跟這種「陌生人」進餐，可以爆頭。

等等...

這是近期跟朋友用餐的口頭禪，原因不是祈禱，而是滿足一下發展到近
乎「戀攝癖」的攝影慾，拿著相機對準按掣很簡單，但當技術「升呢」
，對完成品有要求，就要時間，調較光圈ISO不能馬虎，否則按快門沒
有快感。

係咪悶親你？

對方是個滔滔不絕，出口成Gag的人，我呢，極品，不用chok樣扮cool，
「令人感覺很惡很串」的外表，性格是《沉默的羔羊》，慘了，氣氛就
像關島對巴西，很一面倒。「點解你唔講野？」「你會唔會覺得我好煩
？」，人家很好，關心你感受，但你呢？「我係咪悶親你？」，哈，毒
過施丹比直線，效力仲快過必理痛特效，即時令對面Dead air，要搞肅
靜氣氛，原來我有天份。

形勢180度逆轉

就這樣過了近兩個小時飯聚，應該沒有懸念，但世事難料，局勢變化有
時根本無跡可尋，我問「你...係咪要返屋企喇？」，「唔返屋企...有
咩做？」佢答，溝通過後，排除了唱K，接納了睇戲，但稍為頭腦清醒的
，都知道星期日10點9這個時間，在銅鑼灣買飛睇戲幾乎是一個笑話，午
夜場即使有，都開場了，未開場的，剩下的座位必定是雞肋，若然未開
場又大把位，就是這套戲有問題了，結論是，這兩個人，都不清醒。

彌留

光蔭似箭，由時代行到銅鑼灣JP，轉眼間又半小時，對方是「正常人」
，第二日開早，不像我這種人鬼難分的「長通粉」，考慮到「人鬼殊途
」，我又一次開口問「你，洗唔洗返去？」「你搭咩車返」「我無諗住
咁早返屋企，可能去打機」「咁我陪多你一陣」，我承認，我有微笑。

企一晚

去世貿食滿記食到吸塵機執檯趕客，去首飾店睇耳環，再去銅鑼灣廣場
探提款機，「走意」仍然未到，猶記得櫃員機前，無心插柳一句「呢度
幾好，有冷氣」「咁企一晚囉」「好呀」，然後就背貼牆企，好低能，
低能到有露宿者入侵，先捨得離開。

我唔會嗌非禮

過了十二點，回家恐怕是唯一選擇，巴士上，大家都有點累了，都趴在
前面，看著再前面，一個禿頭肥佬，猥褻地攬著身邊女伴，我好奇，又
非常坦白的問「如果我好似前面個肥佬咁攬住你，你會唔會嗌非禮？」
「唔會，但我會嗌強姦，仲會將件事講比我信任既人知」很好的reax

對面馬路

落車了，其實這一區並不陌生，因為曾經在南傳工作一段時間，但要送
人回家，還是要做隻貓做隻狗的跟在後面，然後，到了一個燈口，爛GAG
來了，「你知唔知點解對面馬路好吸引？」「點解？」「因為『對面馬
路如此吸引』囉」我呆左、O嘴「唔明呀？你知唔知點解綠燈之後會變
紅燈？唔知呢？『明明綠燈轉眼便成紅燈』嘛」原本，我以為我個人已
經夠爛，呢一刻，簡直崩潰。

我走了

過到很吸引的對面馬路，就是終點了，「你識唔識搭車返去？不如我送
你搭車」「唔得，而家係我送你返屋企」我還沒變，大男人得很「我到
了」「咁，再見了」「再見」「拜拜」「拜拜」「我走喇」「我返去喇
咁」「拜拜」「再見」...經過十多句道別，對方連日文都出動了，可恨
我外語能力低，只能扮馬英九「我代表，台灣政府，向你，說一句，再
見」，然後接近九十度鞠躬，對方有樣學樣，卻忘記自己會走光，「你
走光了」「係咩」然後按著衫領再來，實在無聊，也實在有feel。



這晚是開心的，也是遺憾的，開心的不用說，遺憾的是，經過這一晚之
後，心態告訴自己一個殘酷的現實：我老了。

或許這樣說，很「扮成熟」，但心態是，我不能再像學生時代，無憂無
慮無牽無掛求求其其去追求這些感覺，可能我悲觀，我覺得這一晚、這
種感覺不能長久，終有一日，對方會明白，對著我這種呆笨木頭真的很
沒趣，浪費自己時間，也許我想得太多，但我大概不能再承受那種由高
點突然跌下的感覺，我不再年輕了，顧慮多了，如果給五六年前的自己
，看到現在的我，大概都看不起，太畏首畏尾了。

現在想要的，是穩定

有些感覺，偶而淺嘗不錯，沉迷下去，傷身也傷心。

這晚的感覺，實在值得blog一blog佢，好在對方沒有這個blog的網址，
實在blog得很暢快。

哈哈。

--------------------------

踢波

▲國王的波襪：
當日，有條粉皮去踢波，唔記得帶波襪同Pad
勉強上陣廿分鐘，交出一個入波同一個助攻，
協助球隊大勝四比一。

----------------------------

實在好懷念踢石地

從來都唔覺得踢草地會好玩過踢石地，原因有三：

一，由細到大都係踢石地波，草地？
唔係無，但係落親場都係小丑戲居多

二，承上，石地踢得多，淨係識猜波
，踢草場，試問有幾多人真係識猜波
？又諗，踢草場都猜到波既，會唔會
同你踢先？

三，又承上，本身腳力已經唔夠，踢
草場，遠射唔洗諗，加上而家隻右腳
有問題，玩完啦

直至同基恩隊波踢，先開始改觀，咁又坦白講，
佢隊波，小丑戲、唔識猜、無遠射，其實樣樣都
有少少

但係人無完美，我自己何嘗唔係一個無速度、唔
夠快、走唔郁既極品？

大家都有缺點，消極睇，係攬住一齊死；而積極
去諗，係可以將僅有既優點拎曬出黎，互補不足

同佢地踢，通常踢右中場，要靠我食糊，死左九
世了，靠我爆落底線出波？同個阿叔鬥跑都未必
贏啦

我唯一既優點，就係「會交波」，唔好以為交波
係一件好簡單既事，事實上好多人踢左好多年波
，連呢樣最簡單既野都做唔到，最後令成件事錯
曬

呢隊波，可以話用盡我呢個優點，佢地唔會靠我
搵食，跑得既搶得既大有人在，我只係需要將個
波傳去應該傳既位，得閒走下位，就能夠間唔中
比下助攻同入波，我既缺點，都比其他人既優點
覆蓋了

結論係，人可以貌相，但睇野就要睇多幾面。

癲完。

恐怖

從來都唔明
點解呢世人
總係會有好多奇奇怪怪既事
同我做朋友

半年前
突如其來既「床邊的恐怖」
都算喇
今日發生既...又算點？

完全唔知想點
亦唔知可以點
亂到頭都叉開
自然唔想繼續鑽牛角尖
於是出去打個轉
又認識左個有趣既朋友

一個專幫人籌備婚禮既策劃人

內容不提
好記得佢唔止一次語重深長同我講：
「知唔知點解香港結婚叫做『做老襯』？
因為香港女人同男人離婚
係可以分你一半身家
你諗諗有乜野係結婚前唔做得
結婚後先做得？
好似諗唔到，係咪？
咁你又諗諗
有乜野結婚前做得
結婚後唔做得？
太多諗到爆頭呢？
結婚結到咁樣
唔係老襯係乜野？
所以，將來結婚
記住...（內容保密，有興趣自己問我，只限男士）」

佢引用一個例子
有一個女人
同一個有錢佬結婚
結婚後三年就辦離婚
然後分左一間屋同四百幾萬
之後講左兩句勁野：

「你做三年，有無我賺咁多？」
「咪當做三年雞，仲要係人地當正你係老婆喎，哈哈」

聽落
係幾恐怖

但係諗落
你鍾意呢個女人
先會同佢結婚
如果佢咁樣走左去
你心情又點止無左一半身家咁簡單？

所以
根本無得驚
最緊要係
揀岩先

==========================

台北

唔寫日記一個月
其實都好過份
話明日記
點都應該比少少尊嚴佢

雖然我想話：「我唔會再冷落個日記架喇」
但我怕我做唔到
既然未必做到
唔講出黎對大家都好

六月尾台灣之旅
真係好想有續集



...內容不會作廢吧，哈哈