入局

尋日上網搵搵下資料
突然搵到原來IPHONE都有《英傑傳》系列同人作品《趙雲傳》

早於PC GAME年代
已經玩過《英傑傳》、《孔明傳》、《曹操傳》
同人作《姜維傳》未玩過
因為電腦run唔到呢隻舊game

入到apps store一睇
免費
其實有d驚奇
皆因呢隻game

都算係PC版戰棋game直dup
照理應該無乜油水位

一口氣沉迷打左十關
彈左一句「休閒版體驗到此為止」
要我俾12蚊買隻game續關

果一刻真係苦笑
其實我老早預左俾錢玩
硬係要做到好似免費開放任玩咁引人
引到你洗濕左個頭進退兩難先問你收錢\
的確係可以屈到好多原本無諗住俾錢既人落疊

只不過
對於原本已經諗住科水既我黎講
就會覺得呢種手法相當討厭





感覺就好似俾個努力塑造到自己好完美既人狠狠地fake一fake咁




脫離自責期之後
發現自己真係戇㞗到慘不忍睹

餘震

餐廳買飯唔記得找錢
自己煮飯唔記得落鹽
有人叫我幾聲無反應
十字路口行錯了方向


睇過既戲院唔想再去
食過既餐廳唔想再食
細致到
就連搭過既電梯都唔想搭


繼續陪笑
繼續嬉戲
繼續寫稿
繼續營役


餘震

流星

今晚
到公司外面睇流星雨

雖然話每粒鐘有120粒流星
但就算去到郊外都要打個五折
更何況係我所處地方
有街燈有民居
可能只得幾粒

一個鐘頭去撞幾粒流星
係一件自以為浪漫其實相當on9既事

我細細個就係個天文L
未到小學六年級已經知到九大行星
星座、拍攝流星及星軌既方法等等

每當新聞話有流星、月蝕、日蝕
我都會執齊架撐興緻勃勃
叫埋同學一齊去睇

還記得十N年前去石澳山邊
一個鐘睇到十幾廿粒

此後到06,07年另一次流星雨
已經得番幾粒

今晚
明知多雲
明知要返工唔去得遠
要係公司附近碰運氣
一樣照等

一個鐘
幾粒流星閃過既機會
其實眨多幾次眼就會無左

不過
對於我黎講
我只會覺得
去、就有機會
哪怕是0.001%都係機會
唔去、就肯定無
下一次睇流星雨既機會
可能要等到2046

結果
用盡能夠等既時間
都只係同天上面舊雲對望

件事係幾柒
但值唔值得
自己知就可以
有d野又真係唔須要同其他人交代

堅持

當你去搵一堆旁邊既人
幫手去做一件事
但搵既過程裡面
你發覺旁邊既人都已經預設左件事係唔work

果種感覺就好似一年前坐係金鐘
睇住一d朋友send俾我既whatsapp咁

其實唔能夠怪其他人
香港地不嬲現實
大家都習慣見到勝算、有機會贏
先會去做
而無諗過其實每每有人贏到開巷既例子
都係事前個個覺得唔work而潑冷水

工作如是
生活目標如是

只係我無諗過原來愛情都會係咁

從一開始
大家都明明白白
知道一齊之後將會發生既問題
對我黎講
既然都決定一齊
接住黎既時間應該係一齊諗辦法解決



點可能係一齊既時間裡面
搵出呢d問題出黎證明件事係唔work？

「我都話左係唔得架啦，個個都咁講」

既然一早已經打定輸數
咁做乜要開始？

更可怕既係
情緒一起
就將所有開心既野抹甩
講到我「唔會為任何一個人改變自己」


我真係無改變過？

一諗到呢度
我就覺得自己從不斷自責既循環中走番出黎

對對錯錯
永遠得兩個人最清楚

「有些事，不是看到希望才堅持，而是堅持了才看到希望」

離開

離開香港一下
盡快忘記所有就好

當然
旅行目的地
難免又有一番虛無狂想

好想快快擺脫不斷自責又自責這個循環


===================================



以後都唔敢再講自己好認真、或者好鍾意，之類
有d說話講一次可以
講多幾次
人就會唔信
再講多幾次
就會變成笑話
那怕你真係次次去到盡都好

係fd就會明
我係個一係唔做一做就做到世界盡頭既人
如果fd左多年
都係唔明仲要笑埋一份

以後都係客客氣氣、閒話家常
做個點頭之交level 5就算


===================================



「你散左咩？」
「係啊」
「容光煥發既？」

係咩？